नेपाल समाचार
-प्रतीक्षित फिल्म ‘जारी २’ असोज ३ मा प्रदर्शनमा आउने भएको छ । यो मितिमा ‘जारी २’ आउँदा फिल्म ‘सोल्टिनी’लाई बक्स अफिसमा अफ्ठयारो पर्ने देखिन्छ ।
गायकसमेत रहेका प्रकाश सपुत र नायिका परीक्षा लिम्बू स्टारर ‘सोल्टिनी’को प्रदर्शन मिति असोज ३ लाई नै तोकिएको थियो ।
नायक दयाहाङ राई र नायिका मिरुना मगर स्टारर ‘जारी २’ले शुक्रबार उक्त मितिमै प्रदर्शनमा आउने घोषणा गरेको छ । अर्थात्, यी दुई फिल्मको बक्स अफिस भिडन्त हुने देखिएको छ ।
‘जारी २’ हिट फिल्म ‘जारी’को सिक्वेल भएकाले दर्शक प्रतीक्षामा छन् । उपेन्द्र सुब्बाको निर्देशन भएकाले पनि यो फिल्मले राम्रो व्यापार गर्ने आकलन छ ।
यो अवस्थामा ‘जारी २’को छायाँमा ‘सोल्टिनी’ पर्न सक्छ । अर्थात्, हिट फिल्मको सिक्वेलसँग प्रतिस्पर्धा गर्न ‘सोल्टिनी’लाई सहज देखिँदैन ।
यो अवस्था ‘सोल्टिनी’ पूर्वनिर्धारित मितिमा नै प्रदर्शनमा आउने सम्भावना कम देखिन्छ ।
खैर, ‘जारी २’ सँग ‘सोल्टिनी’ले प्रतिस्पर्धा गर्छ कि गर्दैन त्यो थाहा पाउन अब धेरै समय बाँकी छैन ।
स्रोतका अनुसार ‘सोल्टिनी’का निर्देशक अर्जुन सुबेदी ‘जारी २’ असोज ३ मै आएको अवस्थामा प्रदर्शन मिति हेरफेर गर्ने मनस्थितिमा रहेका छन् ।