नेपाल समाचार
पोखरा । सुकुम्बासी टोल । गरीब परिवार । छाप्रोमा श्रीमान् श्रीमती मात्रै । अब छाप्रो उजाडियो । कान्छी बनाएर भित्राएकी श्रीमतीलाई श्रीमानले नै मारे ।
कास्कीको माछापुच्छ्रे गाउँपालिका–५ रिभाान स्थायी घर भएका ५८ वर्षीय जङ्गे सार्की र ५३ वर्षीया छुनु भन्ने जमुना नेपाली २० वर्षदेखि पोखरा–२७ रिठ्ठेपानीको शान्ति खहरेस्थित सुकुम्बासी टोलमा अस्थायी छाप्रोमा बस्दै आएका थिए । ३५ वर्ष अघि नै एक वर्षको छोरा छोडेर जेठीले अन्तै विवाह गरेपछि जङ्गेले जमुनासँग दोस्रो विवाह गरेका थिए ।
दुधे छोरा पनि जमुनाले नै हुर्काइन् । अहिले ती छोरा बुहारीसँगै रिभानमै बस्दै आएका छन् । रिठ्ठेपानीमा जङ्गे र जमुनामात्रै थिए । जङ्गे ज्यामी काम गर्ने मिस्त्री र जमुना घरायसी कामहरु गर्दै पेट पाल्दै आएका थिए ।
जमुना यही साउन ८ गते छाप्रोमै मृत भेटिइन् । आफ्नै सुत्ने कोठामा मृत अवस्थामा रहेको भन्ने सूचना कास्की प्रहरीमा आएपछि घटनाको छानबिन र शङ्कास्पद व्यक्तिहरूलाई निगरानी र सोधपुछमा लागेको प्रहरीले मृतकका श्रीमान् जङ्गेलाई नै साउन ८ गते नियन्त्रणमा लियो।
जग्गा बेच्ने विषयमा वादविवाद भएपछि जङ्गेले जमुनालाई दुई पटक मुक्का प्रहार गरेको र भित्तामा टाउको ठोक्काएर मारेको खुलासा भयो । जिल्ला प्रहरी कार्यालय कास्कीका सूचना अधिकारी प्रहरी नायव उपरीक्षक हरि बहादुर बस्नेतका घटनाको छानबिन र शङ्कास्पद व्यक्तिहरूलाई निगरानी र सोधपुछमा लागेको प्रहरीले मृतक जमुनाका श्रीमान् जङ्गेलाई नै साउन आठ गते नियन्त्रणमा लियो।
कास्की प्रहरीले आइतबार पत्रकार सम्मेलन गरी प्रारम्भिक अनुसन्धानका क्रममा खुलेको सूचना पत्रकारमाझ साझा गरेको हो । साउन ६ गते राति करिब १० बजेको समयमा खाना खाएपछि एक गिलास रक्सी सेवन गरेका जङ्गेले श्रीमती जमुनासँग जग्गा बिक्री गर्ने प्रस्ताव राखे । तर, जमुनाले मानिन् । त्यसपछि उनले मुक्का प्रहार गर्दै टाउको ठोक्काए ।
श्रीमतीलाई अचेत अवस्थामा छाडेर जङ्गे आफ्नो घर बाहिर रहेको टिनको टहरामा सुत्न गए । भोलिपल्ट साउन ७ गते बिहान उठेर छिमेकीको घरमा चिया खान गए । त्यतैबाट ठेकेदारलाई भेटेर पैसा लिन भनी शिशुवातर्फ लागे। दिनभर ठेकेदारलाई भेट्न नसकेपछि साँझ घरमा आई खाना बनाए, आफूले खाए तर श्रीमतीको वास्तै गरेनन् ।
साउन ८ गते पनि बिहान उठेर छिमेकी मामा पर्नेको घरमा गई चिया खाएर ठेकेदारलाई भेट्ने भन्दै पुनः शिशुवातर्फ लागे। घटना भएको तेस्रो दिनसम्म पनि अभियुक्तले आफ्नी श्रीमतीको बारेमा खोजी गरेनन्। उक्त दिन साँझ करिब सवा पाँच बजेको समयमा जङ्गेको घरबाट केही दुर्गन्ध फैलिएपछि भने छिमेकीले प्रहरीलाई खबर गरे । तीन दिनमा मृत शरीर सडेर दुर्गन्ध फैलिएको थियो।
जिल्ला प्रहरी कार्यालय कास्कीका एसपी श्यामबाबु ओलियाल पक्राउ परेका सार्कीलाई कास्की जिल्ला अदालतबाट कर्तव्य ज्यान सम्बन्धी मुद्दामा छ दिनको म्याद थप गरी थप अनुसन्धान चलिरहेको जानकारी दिए ।