नेपाल समाचार
–वैदेशिक शिक्षा र रोजगारीको सपना पूरा गर्न संघर्षरत युवाहरूको कथामा फिल्म ‘रातो पासपोर्ट’ निर्माण हुँदै छ ।
सुखी परिवारको कल्पना गरेर विदेशमा पुगेको युवाले सफलता चुम्न गर्ने मेहनत र त्यसभित्रको संघर्षको पाटोलाई यो फिल्मले चित्रण गर्दैछ । फिल्मलाई विगत सात वर्षदेखि युरोपको पोर्चुगलमा बस्दै आएका लोकबहादुर तामाङले निर्माण गर्दैछन् ।
सिमसोन तामाङले यो फिल्मलाई निर्देशन गर्दैछन् । युरोपका देशहरूमा त्यहाँको नागरिकता (रातो पासपोर्ट) प्राप्त गर्ने उद्देश्यका साथ पुगेका नेपालीहरूले गर्ने संघर्षको कथालाई दर्शकमाझ पुर्याउन फिल्म निर्माणमा हात हालेको तामाङको भनाई छ ।
त्यसो त एक समय मोडलिङमा करियर सुरु गरेर फिल्ममा स्थापित अभिनेता बन्ने सोच बोकेका तामाङ अब निर्माणमा जुटेका हुन् ।
‘चलचित्र समाजको ऐना पनि हो, हजारौँ किताबले बदल्न नसकेको समाज एउटा चलचित्रले बदलिदिन्छ’, तामाङ भन्छन्, ‘ रातो पासपोर्टको कथामा आफैलाई देखेपछि, विदेशी नागरिकता पाउन संघर्ष गर्ने हरेक नेपालीलाई देखेपछि यो कथा फिल्मकै माध्यमबाट धेरै दर्शकमाझ पुर्याउनुपर्छ भनेर निर्माणमा हात हालेको हुँ।’
सिबड्र्स पिक्चर्स र होप्स बजको प्रस्तुति तथा ट्राइडेन्ट कन्सेप्टको सहकार्यमा बन्न लागेको फिल्मको कथा माइकल तामाङले लेखेका हुन् भने पटकथा तथा संवाद प्रदीपकुमार चौधरीले तयार पारेका छन् ।
यो फिल्ममा प्रवेश पौडेल कार्यकारी निर्माता रहनेछन् । फिल्मको छायांकन पोर्चुगल, युरोपका अन्य केही देश र नेपालमा गरिनेछ ।