नेपाल समाचार
एसीसी मेन्स यु-१६ क्रिकेट इस्ट कपको पहिलो खेलमा नेपालले सिंगापुरलाई ६ विकेटले पराजित गरेको छ ।
मलेसियाको युकेएम ओभलमा आइतबार भएको खेलमा सिंगापुरले टस जितेर पहिले ब्याटिङ गरेको थियो ।
उसले ३६.१ ओभरमा सबै विकेट गुमाएर १३८ रन मात्र बनाउन सक्यो। जवाफी ब्याटिङका क्रममा नेपालले ३३.३ ओभरमा ४ विकेट गुमाउँदै लक्ष्य पूरा गर्न सफल भयो ।
नेपालको जितमा ओपनर प्रसिद्ध जैशीले ९७ बलमा ५ चौकासहित ५५ रन बनाए। अर्का ब्याटर रौनक श्रीवास्तवले ४४ बलमा ५ चौका र १ छक्कासहित ४० रन बनाए । उता पराजित सिंगापुरका बलर आकाश तेजाले ३ विकेट र युभान पाण्डेले १ विकेट झारे ।
यसअघि सिंगापुरका लागि कप्तान रियन नायकले ५३ बलमा ९ चौकासहित ५३ रन बनाएका थिए । ओपनर आहान भुधानभामले ३३ बलमा ३८ रन बनाउँदा रोशन अरुन ११ रनमै समेटिए ।
नेपालका लागि कप्तान विपिन शर्माले ४ विकेट झारे। सचिन भट्टले ३ विकेट लिए। शुभम खनाल र अभय यादवले १-१ विकेट झार्न सफल भए ।
यस जितसँगै नेपालले २ अंक बनाएको छ। नेपाल क्रिकेट संघले गत जेठमा सुर्खेतमा सम्पन्न टीबी साह मेमोरियल यू-१६ राष्ट्रिय प्रतियोगिताका उत्कृष्ट खेलाडीबाट टोली बनाएको थियो ।
जारी प्रतियोगितामा नेपालसहित १० टोलीले सहभागिता जनाएका छन् । दुई समूहमा विभाजन गरिँदा ‘ए’ मा नेपाल, सिंगापुर, इन्डोनेसिया, भुटान र जापान छन्। समूह ‘बी’तर्फ आयोजक मलेसिया, हङकङ, माल्दिभ्स, थाइल्याण्ड र म्यानमारलाई रखिएको छ ।
नेपाल यसअघिका तीन संस्करणमा उपाधि विजेता टोली हो । नेपालले मंगलबार जापानसँग खेल्नेछ । तेस्रो खेलमा आगामी आइतबार इन्डोनेसियासँग खेल्ने तालिका छ । समूह चरणमा अन्तिम खेल नेपालले भुटानविरुद्ध खेल्नेछ ।
समूह चरणअन्तर्गत हरेक समूहबाट शीर्ष दुई देश सेमिफाइनल जानेछन् । यो प्रतियोगिताको फाइनल भिडन्त असार २१ गते हुने तालिका छ ।