नेपाल समाचार
काठमाडौं – नायक विपीन कार्की र मिरुना मगर केन्द्रीय भूमिकामा रहेको फिल्म ‘ऊनको स्वीटर’को ट्रेलर सार्वजनिक भएको छ ।
निर्माण पक्षले मंगलबार कमलादीस्थित प्रज्ञा प्रतिष्ठान भवनमा कार्यक्रम आयोजना गरी वैशाख २६ बाट प्रदर्शनमा आउने यस फिल्मको ट्रेलर सार्वजनिक गरेको हो ।
ट्रेलरले गुरुङ समुदायकी युवती र काफ्ले थरका व्यक्तिको प्रेममा आधारित कथामा फिल्म बनेको प्रष्ट पारेको छ ।
म्युजिक भिडियो निर्माण गरी चर्चा कमाएको आर्टमाण्डू प्रालिको ब्यानरमा बनेको यो पहिलो फिचर फिल्म हो । फिल्मका निर्देशक र लेखक नवीन चौहना हुन् ।
निर्देशक चाहौनका अनुसार यो फिल्मको छायाङ्कन पाँचथर जिल्लामा गरिएको थियो । ट्रेलर सार्वजनिक पछिको प्रश्नोत्तरका क्रममा चौहानलाई ‘ट्रेलर हेर्दा जारीको झल्को आयो, किन ?’ भनी प्रश्न गरिएको थियो ।
चौहानले ‘जारी’ र ‘ऊनको स्वीटर’को छायाङ्कन एकै गाउँपालिकामा भएको र पूर्वकै कथा भएकाले उक्त फिल्मको झल्को आउनु स्वाभाविक भएको बताए ।
‘निर्देशनको सिर्जना र कथावस्तु जारीसँग मिल्दैन । यसमा ढुक्क हुन म आग्रह गर्छु’, उनले थपे ।
‘जारी’कै नायिका मिरुना यस फिल्ममा पनि शीर्ष भूमिकामा रहेकाले उक्त फिल्मको झल्को आएको हुन सक्ने उनले तर्क गरे ।
नायिका मिरुना मगरले भने फिल्म राम्रो बनेको दाबी घुमाउरो पाराले गरिन् । भनिन्, ‘ऊनको स्वीटरजस्तै न्यानोपन दर्शकसम्म पुर्याउने प्रयास गरेकी छु ।’
नायक विपीन कार्की भने छायाङ्कनमा रहँदा सहयोग गर्ने पाँचथरवासीलाई स्मरण गरे ।
यस फिल्ममा नायिका परीक्षा लिम्बू र एलेक्स पारस पनि मुख्य भूमिकामा छन् । उनीहरूसहित विल्सन विक्रम राई, सुनिल पोखरेल, माओत्से गुरुङ र प्रेम सुब्बा लगायतका कलाकारको अभिनय रहेको छ ।