नेपाल समाचार
सञ्चार तथा सूचना प्रविधि मन्त्रालय अन्तर्गतको ‘सेन्ट्रल म्यानेज्मेन्ट टिकट सिस्टम (बक्स अफिस)’ का अनुसार नेपाली फिल्म क्षेत्रका लागि वर्ष–२०८१ समग्रमा सुखद रह्यो ।
यो वर्ष ‘बक्सअफिस’ को तथ्याङ्कअनुसार ६२ नेपाली फिल्म प्रदर्शन भए । विदेशी ८४ फिल्म प्रदर्शन भए ।
यो वर्ष प्रदर्शन भएको फिल्म ‘पूर्णबहादुरको सारङ्गी’ ले घरेलु बजारमा ४६ करोड ८० लाख रुपैयाँको ग्रस कलेक्सन गर्यो। यो फिल्मले इतिहासमा स्मरणयोग्य बन्यो।
यो वर्षको अन्तिम फिल्मका रूपमा ‘पिताम्बर’ र ‘कर्मा’ गत चैत २९ गतेदेखि प्रदर्शन भइरहेका छन्। यो वर्ष नेपाली फिल्मका दर्शक उलेख्य रूपमा बढेको चलचित्र वितरक तथा प्रदर्शकहरूको छाता संस्था नेपाल चलचित्र सङ्घका अध्यक्ष नरेन्द्र महर्जनले बताए।
‘यो वर्ष दसैँ र तिहारमा प्रदर्शन भएका चलचित्रले दर्शकलाई चलचित्र भवनमा तान्न सफल भए। स–परिवार नै चलचित्र हेर्न आएको पाइयो। पारिवारिक चलचित्रले दर्शक बढाउन महत्त्वपूर्ण भूमिका खेलेको जस्तो लागेको छ। यस वर्षको सफलताले आउँदो वर्ष चलचित्र निर्माणमा वृद्धि हुनेछ।’ अध्यक्ष महर्जनले भने।
०८२ को सुरूआती दिन वैशाख १ मा समग्र फिल्मको व्यापार राम्रो हुने निर्देशक पुर्नेन्दु झाको बुझाइ छ। उनले आउँदो वर्ष नेपाली फिल्मका लागि महत्त्वपूर्ण भएको बताए।
‘यो वर्ष प्राप्त सफलताले नयाँ र पुराना दुवै चलचित्रकर्मीको सक्रियता निर्माणमा बढेको छ, आउँदो वर्ष ती चलचित्रकर्मीले चलचित्र लिएर दर्शकसम्म आउनु हुनेछ। नयाँ दर्शकलाई आकर्षित गर्न सके आउँदो वर्ष नेपाली चलचित्रले नयाँ सुरूआत गर्नेछ। यो वर्षको व्यावसायिक सफलतालाई नाघ्नु नै चुनौती देखिएको छ’, निर्देशक झाले भने।
आउँदो वर्ष विसं २०८२ ले यस वर्ष बनेको बजारको आकार बढाउन सक्नुपर्नेमा जोड दिए। आउँदो वर्ष विसं २०८२ मा ८० हाराहारीमा फिल्म प्रदर्शन हुने अनुमान चलचित्रकर्मीले गरेका छन्।
‘बक्सअफिस’ मा रहेको तथ्याङ्कअनुसार ५९ नेपाली फिल्मले कूल कमाइ एक अर्ब ८० करोड गरेको छ। तथ्याङ्क बाँकी रहेका तीन चलचित्र ‘वसन्त’, ‘पिताम्बर’ र ‘कर्मा’ सहित प्रदर्शनरत अन्य नेपाली चलचित्रको व्यापार (ग्रस) पाँच करोड भएको अनुमान चलचित्रकर्मीको छ। यस कारण नेपाली बजारको आकार एक अर्ब ८५ करोड रुपैयाँको हाराहारीमा पुगेको अनुमान गरिएको छ।
प्रकाशित मिति : ३१ चैत्र २०८१,आइतबार ११ :५ बजे