रस अनलाइन खबर. आज २०७७-०४-१७
बाग्लुङ । गण्डकी प्रदेशको विश्वकै लामो दाबी बाग्लुङस्थित कालीगण्डकी नदीमा संसारकै लामो झलुङ्गे पुल निर्माण गरिएको छ । बाग्लुङ र पर्वतको कुश्मा जोड्ने यो पुल ५ सय ६७ मिटर लामो छ ।
अहिलेसम्म सिङ्गल स्पानको ४ सय ९७ मिटर लामो पुल स्वीट्जरल्याण्डमा रहेको रेकर्ड छ । सो रेकर्डलाई तोड्दै सबैभन्दा लामो पुल भनी यो पुललाई गिनिज बुकमा लेखाउने तयारी गरिएको हो ।
सिङ्गल स्पानको यो पुललाई संसारकै लामो दाबी गर्दै ‘गिनिज बुक अफ द वल्र्ड रेकर्ड’मा दर्ता गराउने तयारी छ ।
विश्वकै लामो दाबी गरिएको यो पुलको आवश्यक तथ्याङ्क जाँचका लागि तथ्याङ्क विभागमा पठाइइएको बाग्लुङ नगरपालिकाका सूचना अधिकृत युक्तप्रसाद सुवेदीले बताए ।
नाप जाँच र प्राविधिक मुल्यांकन हुँदै
नाप जाँच तथा प्राविधिक मुल्यांकन लगायतका काम भइरहेको र सबै प्रक्रिया पूरा भएपछि गिनिज बुक रेकर्डमा दर्ता गराउनका लागि मन्त्रालयमार्फत पत्र पठाइने बाग्लुङ नगरपालिकाका प्रमुख जनकराज पौडेलले बताए ।
सबैभन्दा लामो यो झलुङ्गे पुल बागलुङ नगरपालिका–१ बाङ्गेचौर र पर्वतको कुश्मा नगरपालिका–१ पाङ जोड्ने गरी कालीगण्डकी नदीमाथि निर्माण गरिएको छ ।
यो पुल निर्माण भएसँगै बागलुङ बजारबाट अब १५ मिनेट पैदल दुरीमा नै पर्वतको कुश्मा कुश्मा नगरपालिका– १ पाङ पुग्न सकिने भएको छ । पुल नहुँदा घुमाउरो बाटो झण्डै डेढ घण्टा पैदल हिड्नुपर्दथ्यो ।
८५ मेट्रिक टन क्षमताको यो पुलको लाइफलाइन ५० वर्ष रहेको निर्माण कम्पनीले जनाएको छ।
पुल निर्माणको केही कामहरु बाँकी रहे पनि मानिसहरुको आवतजावत नरोकिएकाले खुला गरिदिएको निर्माण कम्पनीले जनाएको छ । पुलको औपचारिक रुपमा हस्तान्तरण गर्न भने बाँकी रहेको छ ।
‘सिङ्गल स्पान’ प्रकृतिका झोलुङ्गे पुलमध्ये यो संसारकै लामो पुल भएको बाग्लुङ नगरपालिकाका प्रमुख पौडेलले दाबी गरे । यो पुलले दुई जिल्लाका पर्यटन तथा आर्थिक विकासमा पनि टेवा पुग्ने पौडेलले विश्वास ब्यक्त गरे ।